Guddoomiyaha Hay’adda Maareynta Musiibooyinka (SoDMA) Mudane Maxamuud Macallin Cabdulle, Wasiirro ka tirsan Xukuumadda JFS, duubab-dhaqan iyo marti sharaf kale ayaa Culimada Soomaaliyeed kala qeyb-galay munaasabadda daah-furka Midowga Golayaasha Culimada oo maanta ka dhacday magaalada Muqdisho.
Culimada Soomaaliyeed ee ku kala jira golyaasha iyo dalladaha kala duwan sida; Hay’adda Culimada, Golaha Guud ee Culimada, Golaha sare ee Culimada, Madasha Culimada ee dacwada iyo Fiqhiga iyo Majmaca Culimada ayaa ku midoobay Golahaan oo u jeedkiisu yahay ka hortagga fidnada iyo fikirka xagjirka.
Guddoomiyaha Hay’adda SoDMA, Maxamuud Macallin oo madasha khudbad ka jeediyay ayaa bogaadiyay midnimada, iskaashiga, isku-duwidda dalladaha iyo isku soo dhaweynta culimada, isagoo xusay in golaha looga baahan yahay inuu qeyb ka qaato dadaallada wacyi-galinta iyo u gurmashada dadkeenna nugul.
Mudane Maxamuud ayaa hoosta ka xaqiiqay muhiimadda ay leedahay furtitaanka Qasnad Qaran oo si mideysan dadka Soomaaliyeed ugu aruuriyaan Sakada iyo sadaqada ay la baxayaan, taasoo ay wadajir u maamulayaan Hay’adda iyo Midowga culimada, wax weyna u tari karta dadaallada gargaarka iyo dadka garab istaagga u baahan.
