Guddoomiyaha Hay’adda Maareynta Musiibooyinka Mudane Maxamuud Macallin Cabdulle ayaa ka qayb-galay kulan casha sharaf iyo sagootin ah oo ay soo qaban-qaabiyeen Wasiir ku xigeenka Wasaaradda ilaalada madaniga, xaaladaha deg-degga ah iyo arrimaha la tacaalidda musiibooyinka ee dowladda Russia Mr Kurynin Roman Viktorovich iyo Guddoomiyaha Gobolka Arkhangelsk, Mudane Alexey Alsufev.
Mudane Maxamuud Macallin oo kulanka khudbad ka jeediyay ayaa ka mahad-celiyay soo dhawaynta diirran, martigalinta heerkeedu sarreeyo iyo sagootinta qiimaha leh, isagoo rajeeyay wada-shaqeyn ku qotonta howlaha bini’aadannimada, taageerada farasamada iyo maareynta musiibooyinka.
Wasiir Kurynin Roman Viktorovich iyo Guddoomiye Alexey Alsufev, ayaa muujiyay dareen ku aaddan sida ay dowladda Russia kaga go’an tahay taageerada shacabka Soomaaliyeed iyo in ay gacan ka gaysato kaalmada bani’aadannimo, farsamo iyo agab si loo taageero mashaariicda kala duwan oo ay ugu horreeyaan kuwo hormarineed ee dalka.
