Intii lagu guda jiray shirka Todobaadka Cimilada Afrika ee ka dhacay magaalada Nairobi ee dalka Kenya, waftiga Hay’adda Maareynta Musiibooyinka ee uu hoggaaminayo Guddoomiyaha hay’adda Maxamuud Macallin Cabdulle ayaa kulan la qaatay agaasimaha xafiiska Dawladda UK u qaabilsan Horumarinta Dibedda ee (FCDO) mudane Damon Bristow.
Kulanka ayaa diiradda lagu saaray sidii lagu xoojin lahaa iskaashiga hadda jira ee dhinacyada gargaarka Beni’aadannimo iyo horumarineed ee Soomaaliya iyo u diyaar garowga duufaanta El Nino oo laga cabsi qabo inay saameyso in ka badan hal milyan oo qof xilli roobaadka soo socda.
Sidoo kale wafdiga SoDMA ayaa la kulmay safiir ku xigeenka Finland u fadhiya Soomaaliya, ahna ku simaha madaxa iskaashiga Finland. Dowladda Finland waxay ka mid tahay deeq bixiyayaasha muhiimka ah iyo dowladaha iskaashiga horumarka la leh Soomaaliya, kana taageera dhinacyada waxbarashada, caafimaadka, deeqaha bani’aadannimo iyo dowlad wanaagga.
