Guddoomiyaha Hay’adda Maareynta Musiiboyinka Qaranka Soomaaliyed Mudane Maxamuud Macalim Cabdulle ayaa maanta xarunta dhexe ee hay’adda ku qaabilay Danjiraha Dowladda Shiinaha u fadhiya dalkeena Fea Shengchao .
Kulanka Guddoomiyaha iyo Safiirka Shiinaha waxaa goobjoog ka ahaa xubno ka tirsan madaxda hay’adda SoDMA ,Safiirka ayaa Guddoomiyaha ku wareejiyey lacag ka badan 150,000 oo dollar oo ay ugu talagaleen in lagu daabulo gargaar mucaawino ah oo hore ugu soo wareejiyeen hay’adda SoDMA, kuwaas oo loogu talagalay in la gaarsiiyo deegannada khawaarjta laga xoreeyey, kuwa laga xoreyn doono iyo dadka ay saameeyeen Abaaraha.
Kulanka sidoo kale waxaa looga hadlay in Dowladda Shiinaha hay’adda ay ka caawiso Mashaaricda Horumarinta, Qalabeynta iyo Dhisida ceelasha biyaha, Tababaridda Shaqaalaha Hay’adda iyo sii xoojinta Xiriirka hay’adda iyo Safaaradda.
