Maxaas-(Radio Muqdisho)-Guddoomiyaha Degmada Maxaas, Cabdi Muumin Xiish iyo Saraakiil ka tirsan Ciidanka Xoogga Dalka ayaa Maanta kormeer dhiirri gelin iyo dar-daaran ah ugu tagay degaanno ay ku sugan yihiin Jabhadda Macawisley oo dhowaan laga xoreeyay Argagixisada Al-Shabaab.
Jabhadda degaanka ee Macawisleyda oo kaashanaya Ciidanka xoogga Dalka Soomaaliyeed ayaa kooxda Argagixisada ka saaray Tuulooyin ay ka mi dyihiin Waab weyn, Cali ganeey , Afar irdood, Miir caddeiyo Dhul daaqsimeed fara badan.
Cabdi Muumin, Guddoomiyaha Maxaas oo la hadlay Warbaahinta Qaranka ayaa sheegay in Dadka ku dhaqan degaannada ay booqdeen ay si weyn ugu riyaaqeen booqashadooda diyaarna ay u yihiin in ay ka qeyb qaataan dagaalka ka dhanka ah kooxda nabad-diidka ah.
Dadka degaanka oo Hubkooda qaatay ee la baxay Macawisley ayaa Laba jibbaaray howl-galladooda ka dhanka ah Al-Shabaab, markii ay Kooxda nabad-diidku kordhiyeen dhibaatada ay ku hayaan Shacabka Soomaaliyeed.
Xoola dhaqatada Soomaaliyeed iyo Dadka deggen Tuulooyinka ay xoogga ku maamulayeen Al-Shabaab ayaa go’aansaday in ay ka gadoodaan dhaca joogtada ah ee ay ku hayaan maalkooda iyo xoolahooda intuba.
