Guddoomiyaha Maxkamada sare ee Soomaaliya ayaa maanta u ambabaxay dalka Tanzania halkaasi oo furmaya shirka guddoomiyeyaasha Maxkamadaha sare ee qaaradda Africa.
Mudane Caydiid Cabdullaahi Ilka Xanaf Guddomiyah Maxkamada Sare ee dalka oo Warbaahinta kula hadlay garoonka Aadan Cadde ayaa sheegay in shirkan uu muhiimad gaar ah uu leehay Qaarada Afrika, iyadoo la isku dhaafsan doono fikrado ku aadan dhinacyada Dastuurka, dacwadaha iyo Denbiyada ababulan, kaasi oo uu sheegay inay natiijo fiican ay ka soo bixi doonaan.
“Ra’yi badan ayaa la is dhaafsadaa, xagga dastuurka, xagga dacwadaha, xaquuqul insaanka ayaa looga hadli doonaa, maxkamadda ugu sareysa ee Qaaradda Afrika ayaa soo qaban qaabisay shirkan kaasi oo lagu qaban doono dalka Tanzania,” ayuu yiri Ilka xanaf.
Dhinaca kale Guddoomiye Caydiid Ilka Xanaf ayaa xusay in 9-ka bishan magaalada Nairobi uu ka furmi doon tababar loo qaban doono garsoorayaal ka kala socda Maxkamadaha Sare ee Dalalka Kenya iyo Soomaaliya, kaas oo ay goobjoog ka noqon doonaan Guddoomiyayaasha Labada Maxkamad sare ee labada dal.
“Garsoorayaasheena iyo kuwa Kenya ayaa tababar wada qaadanaya, aniga iyo guddoomiyaha maxkamadda sare ee Kenya ayaa howsha wax ka sii wadaya ee dhanka tababarada, arrimaha guud ee dambiyada ayuuna tababarka ku saabsanyahay” ayuu yiri Guddoomiyaha Maxkamadda sare ee dalka.
Shirka Guddoomiyayaasha Maxkamadaha Sare ee Dalalka Afrika ayaa ah kii labad ee la qabto, iyadoo Qaarada lagu dhaliilo in ay ka liidato dhinaca Garsoorka, kaasi oo sanadkan ay marti gelineyso dalka Tanzania.
