Guddoomiyaha Maxkamadda Sare Jamhuuriyadda Federaalka Soomaaliya Mudane Baashe Yuusuf Axmed iyo wefti ballaaran oo uu hoggaaminaayo oo maanta safar shaqo ugu baxay magaalada Kismaayo ee Caasimadda ku meel gaarka ah ee dawlad goballeedka Jubbaland, Guddoomiyaha Maxkamadda sare ee Jubaland Mudane Cabdishakur Sh. Maxamed Rashiid iyo qeybo ka mid ah bahda Garsoorka ee Jubaland ayaa si heer sare ah lagu soo dhaweeyay Magaalada Kismaayo.
Safarka guddoomiyaha, ayaa waxa ku wehelinaayey Xeer Ilaaliyaha Guud ee Qaranka Mudane Sulamaan Maxamed Maxamuud, iyo Agaasimaha Guud ee Machadka Tobabarka Garsoorka Mudane Axmed Maxamuud Xasan, waxaana ujeedka safarkoodu uu daaran yahay ka qeyb-galka Shirka Golaha sare ee Machadka Tobabarka Garsoorka Soomaaliya oo ka qabsoomaya magaalada Kismaayo, iyada oo halkaas ay iskugu iman doonaan qeybaha kala duwan ee Garsoorka dalka ee heer Federaal iyo dawladaha xubnaha ka ah Dawladda Federaalka Soomaaliya.
Guddoomiyaha iyo wifdigiisa, ayaa sidoo kale inta ay ku sugan yihiin magaalada Kismaayo, waxa ay u kuur-geli doonaan xaaladda guud ee Garsoorka Jubbaland, horumarada socda iyo caqabadaha horyaala intaba.
