Guddoomiyaha Hay’adda Maareynta Masiibooyinka Qaranka (SoDMA), Mudane Maxamed Macalin Cabdulle, ayaa maanta kulan muhiim ah la yeeshay Madaxweyne ku‑xigeenka Dowlad Goboleedka Hirshabeelle, Mudane Yuusuf Axmed Hagar Dabageed, iyaga oo ku kulmay xarunta dhexe ee Hay’adda si ay uga wada hadlaan xaaladda bini’aadantinimo ee ka dhalatay dagaallada kooxda Khawaarijta ee ka socda deegaanada Gobolka Hiiraan.
Madaxweyne-ku-xigeenka Hirshabeelle ayaa kulanka kaga warbixiyay Guddoomiyaha Hay’adda Maareynta Masiibooyinka Qaranka xaaladda bini’aadantinimo ee ka jirta gobolka, isagoo xusay in colaadahii dhawaan dhacay ay sabab u noqdeen barakaca in ka badan 60,000 oo qof. Dadkaasi ayaa wajahaya duruufo adag oo ay kamid yihiin:
• Hoy la’aan
• Cunto yari
• Biyo la’aan
Barakacayaasha ayaa intooda badan ku sugan magaalada Baladweyne iyo deegaanada ku xeeran, iyaga oo u baahan gargaar degdeg ah si ay uga badbaadaan xaaladda adag ee ay ku sugan yihiin.
Guddoomiyaha SoDMA, Mudane Maxamed Macalin Cabdille, ayaa muujiyay walaac xooggan oo ku aaddan xaaladda, isagoo ballan qaaday in hay’addu ay si dhaqso leh uga jawaabi doonto baahiyaha taagan:
“Waxaan ku hawl-gali doonaa dadaal iyo waqti ku filan si gargaar degdeg ah loogu gaarsiiyo dadka xaaladdoodu halis tahay,” ayuu yiri.
Labada mas’uul waxay si wadajir ah ugu baaqeen hay’adaha samafalka iyo deeq-bixiyeyaasha caalamiga ah iyo kuwa gudaha in ay si firfircoon uga qeyb qaataan gurmadka, iyagoo soo jeediyay in la dhiso hannaan iskaashi oo mideysan si wax looga qabto baahiyaha dadka ay colaaduhu saameeyeen.
Sidoo kale, waxay carrabka ku adkeeyeen muhiimadda ay leedahay in la xoojiyo isku-xirnaanta u dhaxaysa hay’adaha dowladda iyo kuwa samafalka, si loo waafajiyo qorsheyaasha iyo howlaha gurmadka bini’aadantinimo.
