Guddoomiyaha Hay’adda Maareynta Musiibooyinka Qaranka Maxamuud Macallin Cabdulle iyo ku-xigeenka ergeyga gaarka ah ee Xoghayaha Guud ee Qaramada Midoobay u qaabilsan Soomaaliya George Conway, ayaa wadajir u guddoomiyay kulan ay isku yimaadeen dhinacyada ka shaqeeya howlaha benii’aadannimo ee dalka.
Shirka ayaa looga hadlay xaaladda abaaraha, caqabadaha taagan, saamaynta ka dhalan karta is-beddelka ku yimid taageerada dhanka benii’aadannimo ee Maraykanka, xoojinta iskaashiga ka dhaxeeya wada-howlgalayaasha ka shaqeeya howlgallada gargaarka, iyadoo Hay’adda SoDMA qaadanayso doorkeeda hoggaaminta si loo helo jawaab hufan oo waxtar leh.
Guddoomiyaha Hay’adda SoDMA Maxamuud Macallin, oo dhammaan daneeyayaasha uga mahadceliyay dadaalka ay bixiyeen ayaa xusay in si loo xalliyo caqabadaha benii’aadamnimo ee dalka loona hubiyo jawaab isku-xiran oo wax-ku-ool ah xilligan adag loo baahan yahay in dib loo eego hannaanka maalgelinta si loo hubiyo joogteynta taageerada logama maarmaanka ah ee dadka nugul.
