Guddoomiye Ku-xigeenka Arrimaha Bulshada iyo Wacyigelinta Maamulka Gobolka Banaadir Marwo Basma Caamir Axmed (Jakeeti) ayaa maanta daah furtay Tababar soconaya muddo 4 maalin ah oo ay soo qaban qaabiyeen Machadka Dowladda Hoose ee Xamar, kaasi oo ku saabsan daadejinta Adeeg Bixinta Arrimaha Bulshada.
Tababarkaan ayaa waxaa ka qeybgalay Guddoomiye Kuxigeenada Arrimaha Bulshada ee 17 Degmo, Sedexda Deegaan, Howlwadeennada Xafiiska Arrimaha Bulshada, Caafimaadka, Dad dhigista iyo Waxbarashada, iyadoona lagu Baranayo Adeeg bixinta Arrimaha Bulshada sida; Adeegyada Aas-aasiga ee Caafimaadka, Waxbarashada iyo Guud ahaan Adeegyada Bulshada ay ku leeyihiin Dowladdaha Hoose.
Maamulka Gobolka Banaadir iyo Dowladda Hoose ee Xamar ayaa horey Wasaaradaha Waxbarashada iyo Caafimaadka kala soo wareegtay adeegyada Waxbarasho iyo Caafimaadka, taasi oo maamulka ay ka go’an tahay in lasii daadejiyo si Bulshada ay u helaan adeegyada Aas-aasiga ah.
