Shir looga hadlayay kor u qaadista Dakhliga dowladda hoose ayaa maanta lagu qabtay Hoolka shirarka xafiiska Maamulka iyo Maaliyadda xarunta dowladda Hoose ee Xamar.
Shirkaan oo uu shir guddoominayay Guddoomiye ku xigeenka Maamulka iyo Maaliyadda Gobolka Banaadir Ibraahim Cumar Mahad alle (Ibraahim dheere) ayaa waxaa looga hadlay sidii loo kordhin lahaa Dakhliga dowladda hoose, waxaana goobjoog ka ahaa agaasimeyaasha hoos yimaad xafiiska guddoomiye ku xigeenka Maamulka iyo Maaliyadda Gobolka.
Waaxda Canshuuraha dowladda Hoose ee Xamar ayaa soo bandhigtay qaabka ay u qaadaan canshuuraha iyo sida ay uga fogaadaan musuq maasuqa,iyagoo isticmaalaya tiknoolajida casriga ah ee lagu hubiyo gaadiidka bixiya Canshuurta iyo kuwa aan bixin.
Guddoomiye Ibraahim Cumar Mahad alle oo ka hadlay shirka ayaa agaasimayaasha faray in la dardar geliyo uruurinta canshuuraha si adeegyada muhiimka ah loogu qabto bulshada ku nool Caasimadda.
