Guddoomiyaha Baarlamaanka Federaalka ah ee Soomaaliya Mudane Maxamed Sheekh Cismaan Jawaari ayaa maanta furay shir looga arrinsanayo sharciga samaynta Maxkamadda Dastuuriga ah ee dalka.
Shirkaan wada tashiga ee looga hadlayo sharciga dhismaha maxkamadda dastuuriga ah oo horyaalla Barlamanka, isla markaana maray akhrinta 1aad ayaa maanta furitaankiisa waxaa ka qeyb galay Wasiirka caadaaladda, ku-xigeenkiisa, xeer ilaaliyaha guud Qaranka, guddiga garsoorka golaha shacabka Soomaaliyed iyo Wasiirka cadaladda ee maamulka Puntland.
Dhismaha madaxkamada dastuuriga ee dalka ayaa ah mid muhiim u ah dalkeena, isla markaana meesha ka saaraysa, kala aragti duwanaanshaha laga yaabo in ay soo kale dhexgasho hay’adaha dowladda iyo mas’uuliyiinta kale .
Wasiirka Cadaalada iyo arrimaha garsoorka ee Xukumadda Federalka Soomaaliya Cabdullaahi Axmed Jaamac (Ilka-jiir) oo warasyi gaar ah sii yey Warbaahinta Qaranka ayaa tilmamay in baahi weyn loo qabo xilligan dhismaha maxkamadda dastuuriga ee dalka.
“Maxkamadda dastuurka waa mid ku qoran dastuurkeena, waana mida kala saari karta waxkasta oo dastuurka waafaqsan, waxyaabaha ay qabato waxaa ka mid ah inay dhageysato dacwooyinka dastuurka iyo waxyaabaha dastuurka lagu durayo, sidoo kale waxyaabahay isku qabsadaan dowlad goboleedyada iyo tan federaalka ah waa midda kala saari lahayd, muwaadinta xaqduuri ah ayuu leeyahay, hadii lagu xadgudbo iyada ayay shaqadeedu tahay” ayuu yiri Wasiirka Cadaaladda.
Maxkamadda dastuuriga ee dalka ayaa qayb wayn ka ah xoojinta hay’addaha garsoorka Soomaaliya, taas oo ah sida u kuqoran dastuurka KMG ah ee dalka in la sameeyo mar hore.
