Guddoomiyaha Gobolka Banaadir ahna duqa magaalada Muqdisho Mudane Xasan Maxamed Xuseen Muungaab oo ay wehliyaan mas’uuliyiin ka tirsan maamulka Gobolka ayaa maanta dhagax dhigay waddo laami ah oo laga hirgelinayo degmada Hodan.
Wadadan ayaa ka bilaabanaysa isgoyska Taleex, taasi oo ku eg ilaa iyo jidka wadnaha, iyadoo mashruucan ay taabo gelineyso dowladad Norway, oo Maamulka Gobolka banaadir u soo marsiisay dhanka Wasaaradda Maaliyadda ee Xukuumadda, waxaana ay qeyb lixaad leh ka qaadan doontaa bilicda caasimadda.
“Waxaan dowladda Norway uga mahadcelineynaa mashruucan dib u dhiska ah ee ay caasimadda ka waddo, taasi oo ay inoo soo marsiisay Wasaaradda Maaliyadda ee xukuumadda Soomaaliya, sidoo kale shirkadda ku guuleysatay fulinta dhismahan inay si cadaalad ah ugu adeegaan bulshada Soomaaliyeed oo ay sare u qaadaan waxyaabaha danta guud, laamiga ay dhisayaana uu noqdo mid tayo leh” ayuu yiri Guddoomiye Muungaab.
Guddoomiyaha gobolka banaadir ayaa sidoo kale baaq u diray hay’adaha sharci dajinta iyo fulinta inay u istaagaan sidii looga wada shaqeyn lahaa horumarka dalka, oo laga tago waxkasta oo dib u dhac u keeni kara, dadaallada ay dowladda Federaalka ah waddo ee ku aadan hiigsiga 2016.
Guddoomiyaha ayaa yiri: “Waxaan baaq u dirayaa dhamaan hay’adaha kala duwan ee dowladda, in waqtiga uu gaabanyahay, howsha nootaala ay badantahay, loona baahanyahay in si wada jir ah howshaasi looga mira dhaliyo, oo loo istaago sidii loo gaari lahaa horumarka la tiigsanayo”.
