Guddoomiyaha Gobolka Banaadir ahna Duqa magaalada Muqdisho Muadne Thaabit Cabdi Maxamed oo uu wehliyo Guddoomiyaha Degmada Hodan Maxamed Axmed Cantoobo ayaa maanta Xafiiskiisa ku qaabilay Muwaadiniin Soomaaliyeed oo dhib ay u geeysteen gaadiidka Ciidamada AMISOM, xilli ay marayeen Wadamada KM4 ee magaalada Muqdisho.
Thaabit Cabdi Maxamed Guddoomiyaha Gobolka Banaadir, ayaa sheegay in ay wada hadleen Madaxda ugu sarreeysa Ciidamada AMISOM, dhibka ay geeysteenna uu kala hadlay, isagoo tilmaamay in sida ugu dhaqsiyaha badan cadaalad ay ku heli doonaan dhibaneyaasha.
“Waxaan la kulmay muwaadiniintii ay dhibka u geysteen ciidamada Amisom, Alxamdulilah way nabad qabaan, cadaaladna way helidoonaan dhawaan” Guddoomiye Thaabit ayaa sidaasi Bartiisa Twitterka ku daabacay.
Dhanka kale Warsaxaafadeed ay soo saareen ciidanka AMISOM ayaa lagu caddeeyay in gaariga shilka geystay uu ahaa mid ciladeysan, ayna ka raali gelinayaan muwaadinkii gaariga dhibta loogu geystay KM4, ayna diyaar u yihiin inay arrintaasi xaliyaan.
