Kulankan qaabilaada oo ay Guddoonka Golaha Aqalka Sare Baarlamaanka Federaalka Soomaaliya ku qaabileen safiirka dowlada Talyaaniga u fadhiya Soomaaliya iyo xubna ka tirsan Wasaaradda Arrimaha Dibada Talyaaniga ayaa waxaa looga hadlay xiriirka dowladaha Soomaaliya iyo Talyaaniga, waxaana uu ka dhacay xarunta Golaha Aqalka Sare BFS.
Kulanka markuu soo gaba gaboobay ayaa ugu horayn waxaa Warbaahinta Qaranka la hadlay Cabdirisaaq Cismaan Jurile Guddoomiyaha Gudiga Arrimaha Dibadda, Iskaashiga Caalamiga, Qorshaynta, Maalgashiga ee Golaha Aqalka Sare waxa uu sheegay in ay ka wada hadleen xiriirka labada dowladod, isagoo intaa ku daray in sidoo kale ay ka wada hadleen halka ay marayso dhexdhexaadintii Golaha uu waday ee Dowladaha Xubanaha ka ah dowladda Federaalka iyo dowladda Dhexe Soomaaliya.
Safiirka dowladda Talyaaniga u fadhiya Soomaaliya M,r, Carlo Campanile ayaa Golaha Aqalka Sare uga mahadceliyay howlaha ay wadaan ee dhex dhexaadinta, isagoo dhanka kalena sheegay in dowladda Soomaaliya iyo Talyaaniga inuu ka dhaxeeyo xiriir soo jireen ah.
Kulanka waxaa ku sugnaa Guddoomiyaha Golaha Aqalka Sare Mudane Cabdi Xaashi, Guddoomiye ku-xigeenka 1aad Golaha Aqalka Sare Abshir Maxamed Axmed, Cabdirisaaq Cismaan Jurile Guddoomiyaha Guddiga Arrimaha Dibadda, Iskaashiga Caalamiga, Qorshaynta, Maalgashiga ee Golaha Aqalka Sare iyo Cali Maxamed Jaamac Xoghayaha Guud Golaha Aqalka Sare.
