Axmed Muuse Nuur oo dhawaan madaxweynaha maamul goboleedka Puntland Siciid Cabdulaahi Deni u magacaabay Guddoomiyaha Gobolka Mudug ayaa sheegay in uu la imaan doono Isbadal ka duwan kuwii ay gobolka Mudug ku hugaamiyeen madaxdii isaga ka horeysay.
Guddoomiyaha susub ayaa si gaar ah u balan qaaday in uu wax ka qabanayo Musuq-maasuqa oo uu ku tilmaamay cudur dilaa ah iyo colaadaha sokeeye ee ku soo laa-laabta deegaanadda gobolka Mudug ,“Waxaan si weyn ula diriri doonaa cudurka aafadda ah ee musuqa iyo amni la ‘aanta anagoo dhammaan daahfuri doona oo caddayn doona siyaasada maamulka isla markaasna cid walba oo wada-shaqayn naga dhaxeysana ula shaqeyn doona sida sharcigu qab.” ayuu yiri Axmed Muuse
Gudoomiye Axmed ayaa shacabka gobolka Mudug iyo Hay’adaha gobolkaasi ka howlgala ka dalbaday in ay ku garabsiiyaan gudashada waajibaadka loo igmaday.
Axmed Muuse Nuur ayaa xilal kala duwan ka soo qabtay gobolka waxa uuna horey usoo noqday guddoomiye ku-xigeenka gobolka iyo la-taliye madaxweyne.
Madaxweynaha Puntland, Siciid Deni ayaa xilka guddoomiyaha maalin ka hor u magacaabay Axmed Muuse Nuur oo ay la shaqeyn doonaan labo ku-xigeen ee uu magacaabay Madaxweyne Deni.
