In kabadan 100 haween ah ayaa maanta magaalada Muqdisho loogu soo geba gebeyey tababar lagu baranayay casharo la xiriira barashada iyo ku dhaqanka shareecada Islaamka ayadoo ay ka qeyb galeen Xildhibaanno iyo culimaa’udiin.
Siminaarkan oo socday muddo labo cisho ah, isla markaana loo qabtay 120 haween ah oo ka kala socday degmooyinka Gobolka Banaadir ayaa la baray casharo la xiriira barashada iyo ku dhaqanka culuumta shareecada Islaamka.
Guddoomiyaha Hay’ada culimada Soomaaliyeed Sheekh Bashiir Axmed Salaad oo ka mid ahaa culimaa’udiinkii ka hadlay siminaarkan ay fulisay mu’asasada SAFA ayaa xusay in muhiimad gaar ah y bulshada u leedahay xoojinta barashada iyo ku dhaqanka shareecada Islaamka.
Xildhibaan Maxamed Cabdulle Faarax Geesey oo ka mid ah Xildhibaannada Baarlamaanka ayaa xusay inay tahay tallaabo lagu farxo in haween la baro barashada diinta Islaamka.
“Arrintani aad u qiimaha badan waan u mahad celinaynaa inta gacan ka geysatay, aad iyo aad in wax loo qabto dadkii soo abaabulay, waan u mahad celinaynaa labadaan maalmood duruustii ay u socotay waxaan u rajeynayan qeyrkaan in shacabku ay dib ugu celshaan” ayuu yiri Xildhibaanka.
Xildhibaan Abtidoon oo isna goobta hadal ka jeediyay ayaa isna yiri “Gabdhaha walaalahay ah oo siminaarkani ka qeyb galay ee maalmaha la soo dhaafay labo maal mood ka qeyb galayay, waxaan ugu hambalyaynayaa duruusta naloo sheegay, canaawiyiintooda oo dadka aqoonta u leh ay bixinayeen, sideedana waa duruus loo baahnaa aad ayaan ugu hambaliyeenayaa waxaa u soo jeedinayaa in laga faa’iideeysto”.
