Qalabkan oo ah kuwa loogu talogalay in lagu iibiyo qudaarta noocyadeeda kala duwan ayaa waxaa ka faa’iideystay 50 ka mida haweenka ka gacansada qudaarta, kuwaas oo baahi weyn u qabay, maadaama qalabkan oo ah mid casriya uu ka tayo wanaagsanyahay kii ay horey u isticmaali jireyn.
Mas’uuliyiin ka tirsan dowladda ayaa goob joog ka ahaa munaasabadii lagu qeybinayay qalabkan, waxaana mashruuca Geel uu u soo marsiiyay shirkadda qudaarta ee Somfresh.
Ibraahim Dhaqane Cali oo ka mid ah mas’uuliyiinta Mashruuca Geel iyo madaxa shirkadda qudaarta ee Somfresh Xirsiyo Cabdulle Siyaad oo ka hadashay deeqdan ayaa tilmaamtay inay tahay qprshe shaqo abuur loogu sameeynayo haweenka.
Guddoomiye ku-xigeenka howlaha guud ee gobolka Banaadir Cumar Cali Cabdi ayaa haweenka qalabkan la guddoonsiiyay kula dardaarmay inay uga faa’iideystaan sidii loogu talagalay.
Agaasimeyaasha guud ee Wasaaradaha Beeraha iyo Ganacsiga Soomaaliya ayaa si wadajir a u tilmaamay in mashruucan ay maalgelisay Geel uuna ku soo aaday xilli aad loogu baahnaa.
Senator Zamzam Daahir Maxamud oo ka mid ah Xildhibaannada golaha Aqalka Sare ayaa xustay in haweenka Soomaaliyeed ay laf dhabar u yihiin bulshada, islamarkaana ay mudanyihiin In la maalgeliyo.
