Haweenayda lagu magacaabo Ngozi Okonjo-Iweala oo u dhalatay dalka Nigeria ayaa noqoneysa haweenaydii ugu horeysay iyo waliba qofkii ugu horeeyey oo kasoo jeeda Afrika oo loo magacaabo madaxa Ururka Ganacsiga Adduunka (World Trade Organization) oo la aasaasay sanadkii 1995.
Drs.Ngozi ayaa horey usoo noqotay Wasiirka Maaliyadda ee dowlada Nigeria, iyadoo taageero buuxa ka heshay 164 wadan ee xubnaha ka ah ururkaasi.
Dowlada cusub ee Maraykanka ayaa codkooda ku taageeray murashaxada, halka xukuumadii hore ee Donald Trump diidaneyd in haweenaydan xilka loo magacaabo, Trump ayaaba ku hanjabay inuu Maraykanka la noqon doono xubinimada ururka WTO hadii xilkan loo magacaabo haweenaydan Afrika kasoo jeeda.
Xukuumadii Trump ayaa xilkan la dooneysay Murashax Yoo Myung-hee oo kasoo jeeda dalka Kuuriyada Koonfureed.
Haweenaydan oo ah 66 sano jir ayaa horey usoo qabatay Wasaaraddaha Maaliyada iyo Arrimaha Dibada ee dalka Nigeria, waxayna sidoo kale horey uga soo shaqeysay Bangiga Adduunka, iyadoo xilkan cusub heyn doontaa illaa sanadka 2025.
