Maamulka iyo howlwadeenada Madaxtooyada ayaa markii 8-aad ka qeyb qaatay Barnaamijka ISXILQAAN ee dib loogu dhisayo xarumaha danta guud ee dalka.
Dhismaha ka socda Madxafka Qaranka ayay howl wadeenadu ka qeyb qaateen iyaga oo saacado xiriir ah si wadajir ah uga shaqeynayey dib u dhiska goobaha danta guud.
Maryan Aadan Amiin oo ah wakiilka Tiyaatarka, Madxafka iyo Maktabadda ee Barnaamijka Isxilqaan ayaa sheegtay in shaqaalaha Madaxtooyadu ay kaalin muhiim ah ka qaateen Ololaha Isxilqaan.
Dhinaca kale maamulka Madaxtooyada ayaa dhismaha Madxafka uga qeyb qaatay agab kala duwan oo fududeyn doona dhismaha socda waxaana lagu wareejiyay hoggaanka Isxilqaan.
Ku xigeenka Agaasimaha guud ee Madaxtooyada Mudane Cabdullaahi Sheikh Cabdikariin Yuusuf oo hoggaaminayay hawlwadeenada Madaxtooyada ee maanta ka qeyb galay ISXILQAAN ayaa ku dhiirigaliyay Shaqaalaha Madaxtooyada in ay xoojiyaan ka shaqeynta danta guud.
