Ciidamada Hay’adda Sirdoonka iyo Nabadsugidda Qaranka (NISA) ayaa qaaday howlgallo qorsheysan oo ka dhacay deegaanno dhowr ah oo ka tirsan gobolka Shabeellaha Dhexe, kuwaas oo lagu dilay 13 xubnood oo ka tirsan Khawaarijta oo ay ku jireen horjoogeyaal iyo maleeshiyaad.
Howlgaladan ayaa ka kala dhacay deegaannada Qoordheere, Xawaala-kulan, Reydableey iyo Ceelbaraf, iyadoo ciidamada NISA ay sheegeen in ay ku guuleysteen in ay burburiyaan saldhigyo ay ku dhuumaaleysanayeen iyo iyagoo la wareegay kayd hub ah hub. Ciidamada ayaa burburiyay teendhooyin iyo keyd hub ah oo ay kooxda Khawaarijtu ka dhisteen hooska geedaha.
Howlgalka ugu horreeyay ayaa ka dhacay deegaanka Qoordheere oo hoos taga degmada Raagaceelle, sida ay sheegeen saraakiisha NISA, kooxda la beegsaday ayaa muddo afar maalmood ah isku abaabulayey halka lagu weeraray.
Inta u dhaxeysa deegaannada Xawaala-kulan iyo Reydableey, ciidamada ammaanka ayaa fashiliyey qorshe ay Al shabaab ku doonayeen in ay amniga ku carqaladeeyaan, Waxaana goobta lagu dilay shan xubnood oo isugu jiray horjoogayaal iyo maleeshiyaad.
Ciidamada ayaa halkaas ku beegsaday koox Al shabaab ah oo la tuhunsanaa in ay qorsheynayeen falal argagixiso, Ilaa afar xubnood oo ka tirsanaa kooxda ayaa lagu dilay halkaas.
Taliska NISA ayaa ku sheegay war-saxaafadeedkooda ay kaga hadlayeen hawlgalkaasi ka dhacay gobolka Shablleeha Dhexe, in howlgallada noocan ah ay sii socon doonaan, iyagoo xusay in ay ka go’an tahay ciribtirka hadhaadiga kooxda Khawaarijta ee Al-Shabaab.
