Madaxweynaha dowlad goboleedka Jubbaland Axmed Maxamed Islaam iyo Agaasimaha hey’adda Socdaalka iyo Jinsiyadda Soomaaliya Mudane Cabdulqaadir Cilmi Cali (Cabdul) ayaa munaasabad kooban oo ka dhacday magaalada Kismaayo waxay maanta xarigga uga jareen dhismaha Xarunta Laanta 2aad ee Hay’adda Socdaalka iyo Jinsiyadda ay ka dhisatay Kismaayo.
Madaxweynaha Jubbaland ayaa tilmaamay ahmiyada xaruntaan cusub ay u leedahay shacabka reer Jubbaland, isagoo sheegay in baahi weyn loo qabay, isla markaana ay ka faa’iidaysa doonaan, maadama Jubbaland ay xuduud dheer la leedahay dalalka Kenya iyo Itoobiya, isla markana isku socodka bulshada ay qeyb weyn ka qaadanayso.
Waxaa kale oo Madaxweynaha Jubbaland uu sheegay in dhawaan la furi doono xuduudka ay Soomaaliya la leedahay Kenya, taas oo shaqada Hay’adda wax badan ku soo kordhinaysa muhiimna u ah isku socodka bulshooyinka labada dhinac.
Madaxweynaha Dowlad Goboleedka Jubbaland Mudane Axmed Maxamed Islaam ayaa sheegay in masuuliyiinta hay’ada looga baahan yahay inay adeegyada ay bixinayaan ay shacabka u fududeeyaan iyadoo la raacayo sharciyada iyo hanaanka shaqada ee saxda ah.
