Qaar kamid ah shaqaalaha Hay’adda duulista Hawada oo dhawaan tababar ku saabsan lasocoshada diyaaradaha isticmaala hawada ku soo qaatay dalka Itoobiya ayaa maanta munaasabad ka dhacday dalkaasi lagu guddoonsiiyay Shahaaddooyin.
Tababarkaan ayay ku qaateen muddo bil ah dalka Itoobiya waxaana munaasabadda lagu abaalmarinayay ku sugnaa mas’uuliyiin ka tirsan hay’addaha duulista rayidka dowladaha Soomaaliya iyo Itoobiya.
Wasiirka Wasaaradda Gaadiidka iyoDuulista Hawada Soomaaliya Maxamed Cabdullaahi Salaad Oomaar ayaa sheegay in bisha July dhamaadkeeda ay si rasmi ah u maamuli doonaan diyaaradaha isticmaala Hawada dalka, isagoo xusay in Shaqaalaha Soomaaliyeed ay u tababaranyihiin sidi loo maamuli lahaa hawada dalka.
Hawada Soomaaliya ayaa ku dhawaad 30 sanno laga maamulayay dalka Kenya,iyadoo dhawaan ay lasoo wareegtay Dowlada Federaalka Soomaaliya waxaana la filayaa 27-ka December ee sanadakaan 2019 in agabyo kale oo Casri ah lagu rakabo magaalooyinka Hargeysa iyo Boosaaso, taasi oo ugu dambeyn go’aamin doonta dhameysrtirka waxyaabaha ka dhiman Hay’adda Duulista rayidka Soomaaliyeed.
