Ciidamada amniga ee gobolka Bari ayaa howlgallo ka fuliyay magaalada Boosaaso ee xarunta ganacsiga Puntland, kuwaasi oo ku baadi goobaya sidii ay gacan ugu soo dhigi lahaayeen bamgacmeed xalay lagu tuuray xarunta Bankiga Boosaaso.
Howlgaladan oo ay sameynayaan Ciidanka ammaanka ee Maamulka Puntland ayaa waxa ay ka socdaan xaafadaha ay ka kooban tahay Degmada Boosaaso, waxaana ciidanku ay guri guri u baarayaan xaafadaha magaalada.
Weli howlgaladan lama sheegin cid si rasmi ah loogu soo qabtey, hase ahaatee Ciidamada ayaa galaya inta badan guryaha ku yaalla Boosaaso.
U jeedka howlgalka ayaa lagu sheegay inay tahay sidii loo xaqiijin lahaa nabadgelyada magaalada, isla markaana looga hortagi lahaa kooxaha qaswadaayaasha ah, sida uu ku soo waramay Wariyaha Warbaahinta Qaranka ee Gobolka Bari Maxamed Muuse Tarsan.
