Agaasimaha Guud ee Wasaaradda Caafimaadka iyo Daryeelka bulshada Xukuumadda Federaalka Soomaaliya Dr. Guuleed Cabdijaliil ayaa soo xiray tababarka dib-u-cusbooneysiinta macalimiinta ee Marwo Caafimaad, oo muddo laba Isbuuc ah ka socday Magaalada Muqdisho.
Xubno gaaraya 51 oo ka kala socda shanta dawlad goboleed ee xubnaha ka ah Dowladda Federaalka iyo BRA ayaa ka soo qayb galay tababarkan, Ujeedkiisu ahaa sidii kor loogu qaadi lahaa aqoonta iyo daryeelka Hooyada ee la xiriiray manhajka Caafimaadka bulshada ee dhawaan la cusboonaysiiyay, kaas oo si rasmi ah loo ansixiyay lagana hirgeliyay guud ahaan dalka.
Intaa waxaa dheer, ToT-yadu waxay heleen tababar wax ku ool ah oo ku saabsan ka faa’iidaysiga adeegsiga aaladaha xog ururinta dhijitaalka ah iyo E-learning Moodle App. Xirfadahaan waxaa loo baray si loo fududeeyo faafinta iyo maaraynta xogta iyo suurta gelinta wadaagga aqoonta wax ku oolka leh ee Moodle App-ka.
Hadafka kama dambaysta ahi ayaa ahaa hubinta in bulshada la gaadhsiiyo adeegyo Caafimaad oo isku-dhafan oo tayo sare leh wakhtiga ku haboon iyadoo la xoojinayo dadaalka shaqaalaha Caafimaadka haweenka ee ku salaysan (FHWs).
Dr Guuleed Cabdijaliil Agaasimaha Guud ee Wasaaradda Caafimaadka iyo daryeelka Bulshada Xukuumadda Federaalka oo soo xirey tababarka ayaa hadal ka jeediyay munaasabadda waxa uuna bogaadiyey Is-weydaarsiga Cilmiga lagu horumarinayo dhallaanka iyo Hooyada waxa uuna sidoo kale guusha la taaban karo ku tilmaamay in si guul ah uu ku soo dhamaaday wajigii saddexaad ee tababarkooda.
Agaasimaga ayaa sidoo kale carabka ku adkeeyay muhiimadda ay leedahay in aqoonta iyo xirfadda la gaarsiiyo shaqaalaha Caafimaadka bulshada si daacadnimo leh, isaga oo ujeeddadiisu tahay in la xaqiijiyo bixinta adeegyo tayo sare leh oo kobciya kalsoonida, lahaanshaha, iyo natiijooyinka wanaagsan ee bulshada guud ahaan.
Wasaaradda Caafimaadka iyo daryeelka bulshada Xukuumadda Federaalka Soomaliya Waxaa ka go’an Horumarinta Caafimaadka guud ee dalka iyo sidii bulsho waynta Soomaaliyeed ay u heli lahaayeen adeeg Caafimaad oo tayo leh.
