War ka soo baxay Mareykanka ayaa lagu faah faahiyay duqeymo xagga cirka ah oo lagu bartilmaameedsaday saldhigyo maleeshiyaadka Al-Shabaab ay ku lahaayeen deegaanno ka tirsan gobolka Hiiraan ee bartamaha Soomaaliya.
Related posts
Weerarkan oo xagga cirka ah ayaa waxaa iska kaashaday dowladda Soomaaliya iyo saaxiibada caalamiga ah, kaasi oo khasaare xoogan uu ka soo gaaray maleeshiyaadka Al–Shabaab.
Ilaa 26 ka tirsan kooxda Al-Shabaab ayaa lagu dilay duqeyntaasi oo ka dhacday dhul buuralay ah oo kuyaala inta u dhexeysa deegaanka Garsaani iyo magalaada Baladweyne ee xarunta Gobolka Hiiraan.
Wadarta guud ee argagixisada Al-Shabaab duqeymaha looga dilay maalmihii la soo dhaafay ayaa gaareysa 81, kuwaasi oo isugu jirta maleeshiyaad iyo horjoogayaal ka tirsan Al-Shabaab.
Hal howlgal oo ay si wada jir ah isaga kaashadeen dowladda Soomaaliya iyo saaxiibadeeda caalamiga ah oo dhacay horaanta bisha Janaayo waxaa lagu dilay 52 ka tirsan argagixisada Al-Shabaab.
Dowladda Soomaaliya oo kaashanaysa saaxiibadeeda caalamiga ah ayaa sii kordhisay howlgallada cirka iyo dhulka ah ee ka dhanka ah maleeshiyaadka Al-Shabaab, iyadoo argagixisada Al-Shabaab jab xoogan uu ka soo gaaray duqeymihii ugu dambeyeey ee ka dhacay Koonfurta iyo bartamaha Soomaaliya meelaha ay kaga dhuumaalaysanayeen.
