Guddoomiyaha Jaamacadda Banaadir Dr Cabdirisaaq Axmed Dalmar ahna Dhaqtar ku Taqasusay qaliinka indhaha ayaa dalka Koofur Afrika waxaa uu ku tegay socdaal shaqo iyo shir caalami ah oo uu kaga qeybgalay magaalada Durban ee dalkaan Koofur Afrika.
Prof Dalmar waxaa garoonka diyaaradaha magaalada Johannesburg kusoo dhaweeyay qaar ka mid ah jaaliyadda Soomaalida iyo madaxda hey’adda Universal Relief foundation ee fadhigeedu yahay dalka koofur Afrika, waxaana loo gudbiyay xaafada Soomaalida dagan tahay ee Mayfair halkaas oo ku booqday goobaha waxbarashada ee kala ah Dugsiga hoose dhaxe sare, madrasada Cumar Faaruuq iyo waliba Dugsiga Miftaacul culuum .
Ardayda ayaa si diiran usoo dhaweeyay Prof Cabdirisaaq Dalmar ayaga oo sameeyay dhoola tusyo ay kusoo bandhigayeen qaabka wax loo baro iyo sida loogu dadaalay waxbarashooda iyo ka warqabka lagu haayo xilli walba, waxaana Prof Dalmar uu uga mahad celiyay Macalimiinta iyo Maamulka Hey’adaan asaga oo ardaydana ugu baaqay in ay ka faa’iideystaan fursadaha ay heystaan
Sheekh Maxamed Cabdiraxmaan Abuukar oo ah maamulaha Hey’ada Universal Relief foundation ayaa warbixin guud waxaa uu ka siiyay Prof Dalmar marxaladaha ay wax ku baraan Carruurta iyo guulaha ay gaareen mudadii ay wadeen howshani.
“Baahida keentay in hey’aadaan aan aas aasno waxaa ay aheyd maadaama aan ku nool nahay dal ay joogaan dad kala duwan oo muslimiin ay ku jiraan, sidaa darteed waxaan go’aansaday waxbarashada aan gaarsiino shacabka kala duwan ee halkaan nagula nool, waxaa sidoo kale hey’ada bixisaa gargaar la siiyo dadka masaakiinta ah,xafiis labaad ayaan ka furan doona magaalada Muqdisho”ayuu yiri Sheekh Maxamed.
Intaasi kadib jaaliyada Soomaalida ayaa kulan casho ah u sameeysay Prof Cabdirisaaq Dalmar waxaana ka qeybgalay qeybaha kala duwan bulshada aqoon yahano iyo marti sharaf kale duwan kuwaa oo Dr Dalmar warbixin buuxda ka siiyay Xaalada Soomaalida ku nool dalkaani koofur Afrika.
Guddoomiyaha Jaamacadda Banaadir Prof Cabdirisaaq Dalmar ayaa dhankiisa Jaaliyadda warbixin ka siiyay xaaladda guud ee dalkii hooyo ee Soomaaliya, waxaana uu sheegay in horumaro badan ay ka jiraan isla markaana jaaliyadda loo baahan yahay in ay qeybtooda ka qaataan.
“wadanka waxaa ka jira horumaro badan waxaa laga yaaba in aad Media ka aragtaan dhanka xun ee dalka oo kali ah, laakiin qofkii jooga ama yimaada waxaa uu arkayaa xaqiiqda ka jirta iyo horumarada uu gaaray o ka mid tahay cafimaadka ,waxbarashada ,ganacsiga bilicda magaalada, garoomada, IWM” ayuu yiri Prof Cabdirisaaq.
C/laahi Qorshe
Johannesburg South Africa
