200 oo Carruur ah oo ka mid ah Agoontii ay ka tageen dadkii ku dhintay Qaraxii 14-ka bishii October ka dhacay magaalada Muqdisho ayaa loo qeybiyay deeq lacageed oo ka timid Jaaliyadda Soomaalideed ee Koofur Afrika.
Lacagta oo gaareysa oo ku dhowaad 70,000 (todobaatan kun) oo dollarka Mareykanka ayaa Qofkiiba waxaa la siiyay 300 oo dollar, iyada oo ay goobjoog ka ahaayeen Waalidiinta Carruurta iyo Guddiga gurmadka Qaranka.
Sheekh Maxamuud Maxamed Cadar oo ka mid ah Jaaliyadda Koonfur Afrika ee loo soo wakiishay kaalmadaan ayaa sheegay in abaabulkii ay saameeyeen Jaaliyadda ay ku timid in maanta lagacagtan la soo gaarsiiyo carruurtii ku agoontowday qaraxii musiibada ahaa ee 14-kii October.
Guddoomiye ku-xigeenka Guddiga Taakuleynta Qaranka Maxamed Yuusuf Jaamac Tigeey iyo Sheekh Yuusuf Cali Ceynte oo xubin ka ah Guddiga ayaa sheegay in deeqdaan ay muujineyso sida Soomaalida ay isugu danqaneyso, iyaga baaq u diray bulshada inteeda kale.
Xasuuqii Isgoyska Soobe ayaa mideeyay bulshada Soomaalida oo tan iyo markaasi kaalin muuqata ka qaatay gurmadka Qoysaskii Eheladooda ku waayay halkaasi, iyada oo wali ay soconayaan dadaallada looga jawaabayo baaqyada ka imaanaya guddiyada gurmadka.
