Xafladdan sagatoonta ah ee loo sameeyay sideed arday oo ka mid ah ardayda barata kuliyadda caafimaadka, oo ah dufcaddii saddexaad oo ay Jaamacadda waxbarasho dibadda ah ugu dirto Jaamacado caalami ah oo ku yaala dalalka bariga Afrika ayaa waxaa ka qeyb galay maamulka sare ee Jaamacadda SIU, Macalimiin, waalidiin iyo arday, kaasi oo lagu qabtay xarunta dhexe ee Jaamacadaasi.
Qaar ka mid macalimiinta iyo ardayda Jaamacadda SIU oo xafladda hadalo ka jeediyay ayaa sheegay inay tahay tallaabo lagu farxo in Jaamacaddu waxbarasho dibadda ah u dirto qaar ka mid ah ardayda Kuliyadda caafimaadka, waxaana ay ardayda kale ku booriyeen inay muujiyaan dadaal dheeri ah oo ku aadan inay sare u qaadaan tacliinta sare.
Ku-xigeenka Madaxa caafimaadka ee Jaamacadda SIU Dr Cabdiraxmaan Xasan Maxamed oo xaflad ka hadlay ayaa sheegay in ardaydan ay tahay dufcaddii ugu horeysay sanad waxbarasho ku soo qaadan doono Nairobi University, isagoo xusay in horey Jaamacaddu ay ku guuleysatay in waxbarasho sidan oo kale ay tiro arday ah ugu dirto Jaamacadaha Makerere, Mbarara iyo Gulu ee dalka Uganda.
“Runtii Xafladan labada wax ayay kaga duwantahay, tan koowaad ardayda markii hore waxaa loo diri jiray Jaamacadaha Makerere, Mbarara iyo Gulu ee dalka Uganda, runtii maanta kuwan waxaa loo dirayaa Nairobi University oo ah markii ugu horeysay, marka waxaa laga rabaa inay xoojiyaan aqlaaqdooda, ayna ogaadaan u jeedka halkaasi loogu dirayo” ayuu yiri Dr Cabdiraxmaan.
Maryan Cabdi Maxamed oo ku hadlaysay magaca waalidiinta ardayda sagootinta loo sameeyay ayaa Maamulka Jaamacadda SIU uga mahadcelisay dadaalka ay ku bixinayaan in ardayda kuliyadda caafimaadka ay sanad waxbarasho ku soo qaataan jaamacado ku yaalla dalka dibadiisa, iyadoo kula dar daarantay inay ka fekeraan waxbarashadooda.
“Maamulka Jaamacadda SIU waxaan uga mahadcelinayaa fursada ay siiyeen ardayda kuliyadda caafimaadka, runtii oo ay kaga tilmaamanyihiin Jaamacadaha kale ee dalka, marka waxaan ardayda kula dar daarmayaa inay si wanaagsan wax u soo bartaan, kuwa harayna ay muujiyaan dadaal dheeri ah, si ay u helaan fursadan oo kale” ayay tiri Maryan.
Guddoomiye ku-xigeenka Jaamacadda SIU Maxamed Yuusuf Cumar ayaa hoosta ka xariiqay in ujeedka ay Jaamacaddu waxbarasho dibada ah ugu direyso ardayda ay tahay sidii ay u soo kororsan lahaayeen aqoon dheeraad, isla markaana ay noqdaan dhaqaatiir dhinac waliba ka dhisan oo u adeega bulshadooda, loogana baahanyahay inay ilaaliyaan sumcadda iyo dhaqanka dalkooda.
“Maanta waxaan inta isugu nimid sagootinta ardayda loo dirayo Nairobi University ee dalka Kenya, waa dufcaddii saddexaad, runtii u jeedka aan ka leenahay waa in la heli dhaqaatiir, marka waxaan idinkula dar daarmayaa inaad ardayda asaagiina ah aad wax la qeybsataan” ayuu yiri Maxamed Yuusuf.
Waa markii saddexaad oo ay Jaamacadda SIU arday u direyso Jaamacado ku yaala dalka dibadiisa, waxaana ardaydii maanta ay qeyb ka noqonayaan 65 arday oo Jaamacadda ay u dirtay Jaamacadaha Makerere, Gulu iyo Mbarara ee Wadanka Uganda, halka kuwii maantana loo dirayo Nairobi University ee dalka Kenya.
Sawir Qaade:-Maxamed Macalin Xasan “White-ka”
