Gudoomiyaha Jaamacadda Umadda Soomaaliyeed Dr.Muxamad Axmad Jimcaale oo ay weheliyaan masuulyiin ka tirsan maamulka degmada caabudwaaq ee gobalka G/gaduud, qaybaha bulshada iyo jaaliyadda soomaaliyeed ee deegaanka ka soo jeeda ayaa ka qaybgalay olalaha isxilqaan ee lagu dhisayo qaybo hor leh oo lagu soo kordhinayo jaamacadda, qorshahaasi oo qayb ka ah dadaalada ballaarinta hawlaha jaamacadd, si dadka soomaaliyeed ay fursad ugu helaan in adeegga waxbarashada jaamacadda loo soo dhaweeyo.
Hindisaha qorshahaan oo ay leedahay Xukuumadda Soomaaliya ayaa ka hirgalay deegaanada dawlad goboleedyada dalka, taasi oo horseed u noqotay in bulshada ku dhiiradaan inay isku tashi sameeyaan si adeegyadii ka burburay ay dib ugu dhistaan .
Gudoomiyaha Jaamacadda Umadda Soomaaliyeed Dr.Maxamad Axmad Jimcaale oo la hadlay warbaahinta qaranka ayaa uga mahadceliyay bulshada ku dhaqan degmada Caabudwaaq sida ay usameeyeen isku tashiga ,waxaana uu intaa ku daray in qorshahaan ay dawladda soomaaliya door ka qaadandoonto, si looga mira dhaliyo hiigsiga dawladda Soomaaliya ee ku aadan hormarinta waxbarashada dalka iyo soo celinta xarumahii Jaamacadda umadda ee gobolada dalka .
Waxaa socda dhismaha Fasaladii ay ardayda casharada ku baranayeen ,maadaama ay baahida ardayda deegaanka ay korodhay,waxaa qorshaha dhismahaasi taageeraya Ra’iisulwasaha dalka md:Xasan Cali Khayre uu balanqaaday bulshada markii uu tagay degmadaasi.
Waxyaabaha kale lagu soo kordhinayo Jaamacadda Umadda faraceda Caabudwaaq waxaa ka mid ah dhismaha maktabad wayn oo ay ardayada Caabudwaaq wax ku aqristaan dhismaha hoolka shirarka iyo meel dadku ay ku nastaan.
Gudoomiya J.U.S wuxuu xusay in marxalado kala duwan laga soo maray dib u hawlgalinta jaamacadda umadda soomaaliyeed hadana ay hormuud ka tahay waxbarashada dalka, waxaana lagu bilaabay kulliyado dhawr ah hadana ay rajanayaan in kuwo cusub lagu soo kordhindoono haddii Alle idmo.
“370 arday ayaa lagu bilaabay jaamacadda maantana tirada ardayda afar kun oo arday ayay ku sii dhawdahay ,waxaana soo kordhinaynaa kuliyadii aan is dhahno baahi ayaa loo qabaa, sida Kulliyada sayniska oo aan bilaabayno sanadkaan.
Xaruntii gahayr ayaa qorshaynaynaa in darbi lagu wareejiyo waxaa dayactiri doonaa galaasyo bur bur gaaray ayuu yiri Gudoomiyaha Jaamacadda umadda Soomaaliyeed.
Jaamacadad umadda ayaa sanadkii 2013dii dib loo hawlgaliyay,waxaana ka muuqda harumar ballaaran oo dhinaca waxbarashada ah, waxaana sii kordhaya tirada ardayda iyo xarumaha jaamacadda ay ka hirgalinayso gobolada dalka.
