Munaasabadan deeqda lacagta ah lagu guddoonsiinayay Wakiilo Maamulka degmada Balcad u qaabilsan dhanka abaaraha, isla markaana ay soo dhiibeen Jaaliyadda Soomaaliyeed ee wadanka Sweden, loona soo wakiishay dhallinyaro waxbartay oo ku nool Muqdisho ayaa waxa ka qeyb galay maamulka Degmada Balcad, qeybaha bulshada iyo xubno kale.
Maxamuud Maxamed Cabdulle Deeqow oo ka wakiil ahaa kaalmada lacageed ee loogu talagalay dadka ay abaartu ku saameysay degmada Balcad iyo tuulooyin hoostaga ayaa sheegay inay ka koobantahay toban milyan oo shillin Soomaali ah, isla markaana ay u soo wakiilatay Nasro Maxamed Cali oo ah Guddoomiyaha Jaaliyadda Xamar iyo Xamardaye ee wadanka Sweden.
“Lacagtan waa toban milyan oo shlin Soomaali ah, waxaana loogu talagalay in loogu gurmado dadka ay saameysay abaaraha ka jirta degmada iyo tuulooyin hoos yimaada, si biyo dhaamin iyo adeegyo kale loogu qabto, waxaana rajeynaa in tani aysan noqon doonin tii ugu horeysay, uguna dambeysay” ayuu yiri Deeqow.
Ugaas Maxamed-weli Ugaas Xuseen oo ka mid ah guddiga degmada balcad u qaabilsan dhanka abaaraha ayaa uga Mahadceliyay dhallinyaradii isa soo xilqaantay ee kaalmada lacagta ah soo gaarsiisay, isagoo bulshada intee kale ka codsaday inay u gurmadaan walaalahood ee ay saameynta ku yeelatay abaarta.
“Waxaan u mahadcelineyna dhamaan dhallinyarada aqoonyahanka ah ee lacagtan loo soo wakiishalay iyo Nasro Maxamed Cali oo garatay inay dhibta la qeybsato walaalaheed dhibaateysan, runtii waxaa jirta dad badan oo Alle wax siiyay, waxaana ka codsaneynaa inay ka qeyb qaataan u gurmashada walaalood dhibaateysan” ayuu yiri Ugaas Maxamed-weli.
Guddoomiyaha Degmada Balcad Maxamuud Maxamed Maxamuud Saneey oo soo xiray kulanka ayaa uga mahadceliyay intii gacan ka geysatay in bulshada degmada la soo gaarsiiyo kaalmo lacageed oo uu ku sheegay inay tahay tii ugu horeysay ee nuucaani oo kale ah ee la soo gaarsiiyo degmada, waxaana uu intaa ku daray in guddiga ka kooban 17 ay gaarsiin doonaan dadka mudan in la gaarsiiyo.
“Cidkasta oo gurmad na soo gaarsiisa, waan soo dhaweyneynaa, runtii abaarta ka jirta dalka ayay qeyb ka tahay tan haatan ka taagan Balcad iyo tuulooyinka hoos yimaada, waxaa intaas u sii dheer bulshada inaysan heysan biyo, maadaama ay biyo gureen Webiga Shabeelle, waxaan Alle uga baryaynaa in Ummaddiisa uu ka dulqaado saameynta ay abaaruhu ku reebeen” ayuu yiri Guddoomiyaha degmada Balcad.
