Madaxweynaha Dawlad goboleedka Puntland Dr. Cabdiweli Maxamed Cali Gaas ayaa maanta oo ay taariikhdu tahay 25 October 2017 waxa uu furay Kalfadhiga 40-aad ee Golaha Wakillada Puntland.
Madaxweynaha Puntland ayaa waxaa furitaanka kalfadhiga 40-aad ee Golaha Wakiilada Puntland kala qayb galay Guddoomiyaha Baarlamaanka DFS Mudane. Maxamed Cismaan Jawaari, Guddoomiyaha Aqalka Sare ee Baarlamaanka DFS Cabdi Xaashi Cabullaahi, Ku-xigeenka Guddoomiyaha Aqalka Sare ee DFS, Guddoomiyaha Golaha Wakiillada Puntland Mudane Axmed Cali Xaashi iyo Ku-xigeenadiisa, Masuuliyiin ka tirsan goleyaasha dawladda Federaalka Soomaaliya, mas’uuliyiin ka tirsan goleyaasha dawlad goboleedka Puntland, xubno ka socdey beesha caalamka, maamulka Gobolka Nugaal, kan Degmada Garoowe, Isimo, nabadoono waxgarad, siyaasiyiin iyo martisharaf kale.
Madaxweynaha dawlad goboleedka Puntland oo ka adlay furitaanka kalfadhiga 40-aad ee Golaha Wakiillada dawlad goboleedak Puntland ayaa waxa uu ka hadlay waxqabadka Puntland u qabsoomay muddadii u dhexaysey labada kalfadhi ee sanadkan 2017.
Mudane Cabdiweli ayaa ugu horeyn ka hadlay waxqabadka xukuumadiisa ay ka gaartey arrimaha ammaanka waxaana uu yiri “Mudanayaal, sida aan wada ogsoonahay guud ahaan xaaladda Amni ee Puntland ee bilaha Luulyo, Agoosto iyo Sibteembar 2017-ku waa wanaagsanayd, waana deganayd; Hase yeeshee maadaama ay Punland ka mid tahay dalweynaha Soomaaliya, waxaa marar badan ka dhacay falal fulaynimo iyo gaadmo ah oo ay geysteen kooxaha argagixisada ah (Al-shabaab iyo Daacish) iyo huwantooda, waxaana ka mid ah qaraxyadii la-qabtay, Dagaalkii Af-urur iyo mirtii Kontroroolka Boosaaso”
“Mudanyaal, Waxay Dawladdu amartay in hay’adaha amnigu adkeeyaan ilaalinta xeebaha Puntland, taasoo suuro galisey in 23/09/2017 la qabto dooni siddey hub, waxayna Dawlad Goboleedka Puntland fartay laamaha amniga hubinta iyo baaridda gaadiidka soo galaya xuduudaha Maamulka” ayuu yiri Madaxweyaha Puntland.
“Waxay Dawladdu keentay Shaybaar lagu baarayo dhiiga iyo unugyadiisa (DNA) laguna rakibay caasimadda Puntland ee Garowe, wuxuuna Ciidammada CID-da ka caawin doonaa danbi-baarista iyo sugidda xogta danbiilayaasha” ayuu Mudane Cabdiweli hadalkiisa ku daray..
“Waxaa lagu guuleystay Mashruuca RCRF-II ee uu naga caawiyay Bangiga Aduunku in uu bixiyo sanadkaan laga bilaabo January 2017 ila iyo September lacag dhan $ 671,912.50 oo lagu bixinyay mushaarka 75 shaqaale Dawladeed oo laga shaqaaleysiiyay Ha’adaha Dawlada” ayuu yiri Madaxweynaha Puntland.
Dhinaca kale Guddoomiyaha Baarlamaanka Soomaaliya Mudane Maxamed Cismaan Jawaari iyo Guddoomiyaha Aqalka Sare ee Baarlamaanka Soomaaliya Mudane Cabdi Xaashi Cabullaahi iyo dhammaan mas’uuliyiinta kale ee ka hadashay furitaanka kalfadhiga ayaa ku dheeraaday muhiimadda ay leedhay nidaamka dawliga ah oo hagaaga, iyagoona xusay in Puntland tahay hormuud ka maanta Soomaaliya lagaga dayan karo wax kasta oo horumara.
Guddoomiyaha Golaha Wakiilada dawladda Puntland Mudane Axmed Cali Xaashi ayaa dhankiisa ka jeediyey furitaanka kalfadhiga 40-aad ee Golaha Wakiillada dawladda Puntland waxaana uu Guddomiyuhu xooga ku saaray khudbddiisa arrimo la xidhiida dastuurka Soomaaliya iyo wax qabadkii Golaha Fulinta Puntland u qabsoomay muddadii u dhexeysey labada kalfadhi.
Ugu danbayn, Madaxweynaha dawlad goboleedka Puntland Dr. Cabdiweli Maxamed Cali Gaas ayaa si rasmi ah u furay Kalfadhiga 40-aad ee Golaha Wakiillada dawladda Puntland.
=DHAMMAAD=
