Ku-simaha Ra’iisul Wasaaraha dalka ahna Ra’iisul Wasaare Ku-xigeen, Mudane Mahdi Maxamed Guuleed (Khadar) ayaa guddoomiyay shir looga hadlay dardar-gelinta qorshaha adkaynta amniga Caasimadda oo lagu qabtay Muqdisho.
Kulanka ayaa aad looga dooday ballaarinta qorshaha amniga lagu sugayo si mawaadin kasta oo Soomaaliyeed uu u helo amni uu isku halayn karo.
Ku-simaha Ra’iisul Wasaaraha dalka ayaa laamaha amniga ku ammaanay shaqada ay hayaan, waxa uuna ku dhiirri geliyay in ay laba jibbaaraan, isaga oo ku baaqay in amniga laga wada shaqeeyo oo shacabka Soomaaliyeed ay qaybtooda ka qaataan.
Shirka oo lagu qabtay taliska qaybta guud ee gobalka Banaadir ayaa waxaa kasoo qayb galay mas’uuliyiin ka socota xafiiska Ra’iisul Wasaaraha, wasaaradda amniga gudaha, Guddiga amniga talista Booliiska iyo maamulka gobalka Banaadir.
