Ku-xigeenka cusub ee Ergeyga Gaarka ah ee Xoghayaha-Guud ee Qaramada Midoobay (DSRSG), Marwo Anita Kiki Gbeho, ayaa maanta timid magaalada Muqdisho si ay si rasmi ah ula wareegto waajibaadkeeda xileed ee Howlgalka Kaalmeynta Qaramada Midoobay ee Soomaaliya (UNSOM).
“Sharaf ayay ii tahay fursadda la iisiiyay in aan kusoo biiro bahda Qaramada Midoobay ee Soomaaliya, gaar ahaan waqtigan muhiimka ah oo dalku isku diyaarinayo geedi-socodka doorashooyinka ee kusoo fool leh,” ayay tiri Marwo Gbeho. “Waxaan rajeynayaa in aan la shaqeeyo dadka Soomaaliyeed iyo madaxdooda, iyo dhamaan saaxiibada Soomaaliya ee heer gobol iyo heer caalami, oo aan kala shaqayn doono sidii horumar waara loogusoo dabaali lahaa dalka.”
Ergeyga Gaarka ah ee Xoghayaha-Guud, James Swan oo ka hadlay ayaa yiri “Waxaan ku faraxsanahay in Marwo Gbeho kusoo biirto bahdeena Qaramada Midoobay, iyadoo kaalin hogaamineed ka cayaari doonta hawlaha UNSOM ee dhinacyada siyaasadda, doorashooyinka, xuquuqda Aadanaha, sarreynta sharciga iyo dhinacyada amniga.”
Marwo Gbeho waxay nagusoo biirinaysaa in ka badan 25 sano oo khibrad ah oo ay u leedahay qorshaynta istiraatiijiyadeed, isku-dubaridka iyo maaraynta arrimaha siyaasadda, horumarinta iyo arrimaha beni’aadanimo oo ay ugasoo shaqaysay Xarunta Dhexe ee Qaramada Midoobay iyo xarumaha hawlgallada ee ku kala yaal Angola, Cambodia, Ciraaq, Namibia, Soomaaliya iyo Koonfurta Sudan. Ka-hor intii aanay kusoo biirin UNSOM, Marwo Gbeho ayaa ahayd Ku-Xigeenka Wakiilka Gaarka ah ee Howlgalka Isku-dhafka ah ee Qaramada Midoobay iyo Midowga Afrika ee Darfur (UNAMID).
