Kulan looga hadlayay xoojinta arrimaha garsoorka oo ay ka qeybgaleen mas’uulyiin ka tirsan maamulka Galmudug ayaa lagu qabtay magaalada Gaalkacyo.
Kulanka oo ahaa mid looga hadlayay sida loo dar dargelin karo arrimaha garsoorka iyo cadaaladda laguna qabtay xarunta garsoorka ee degmada ayaa waxaa ka qeyb galay mas’uuliyiin ka tirsan laamaha garsoorka Galmudug, iyadoo uu goob joog ka ahaa Wasiir ku-xigeenka garsoorka iyo cadaaladda ee Galmudug Maxamuud Guure Guuleed.
Guddoomiyaha Maxkamadda Garsoorka ee Gaalkacyo Maxamed Macalin Cali ayaa xusay inay jiraan caqabado la xiriira dhanka fulinta, waxaana uu intaa ku daray in gacan lagu siiyo sidii garsoorka loo dhaqan gelin lahaa.
Wasiir ku-xigeenka garsoorka iyo cadaaladda ee Galmudug Maxamuud Guure Guuleed ayaa sheegay in ay wax ka qabanayaan arrimaha ay ka cabanayaan garsoorka, isla markaana ay xoogga saari doonaan sidii bulshada ay u heli lahayd xukun cadaalad ku saleysan oo laga gudbo in dad si gaar ah loogu taaksado.
“Cadaaladda Noola kasta ayaa u baahan, waa arrin adduunyadaada iyo aaqiradaada u baahan in aad u cadaalad fasho, marka idinkuna ku dadaala, sidii bulshada cadaalad ugu adeegi lahaydeen”ayuu yiri Wasiir ku-xigeenka.
