Wasaaradda deegaanka, isbadalka Cimilada iyo horumarinta reer miyiga Galmudug ayaa maanta xarunta Galmudug ee Dhuusamareeb kulan ku saabsan dhaqan-gelinta xeerarka iyo shuruucaha caalamiga ah ee ilaalinta deegaanka ugu qabatey xubno ka kala socda wasaaraddaha, Qorsheynta, Beeraha, Xanaalada xoolaha, Biyaha iyo ururada bulshada rayadka.
Agaasimaha waaxda Qorsheynta ee wasaaradda Deegaanka Galmudug Daahir Cusmaan iyo Shamso Cabdi Yuusuf, kuxigeenka Agaasimaha guud ee wasaaradda deegaanka Galmudug ayaa ka qayb galayaasha kulanka ku booriyay in ay meeleeyaan tababarada joogtada ah ee la siinayo, iyagoo markaa kadib noqon doona kuwo gudbin kara aqoonta ay ka faa’iideen tababaradan is xigxiga.
Dhowrkii bilood ee ugu dambeeyay ayay wasaaradda Deegaanka Galmudug sameysay dhowr kulan oo dhamaantood ku saabsanaa ilaalinta deegaanka, iyadoo si gaar ah tababaro loo siinayay shaqaalaha wasaraddaha iyo ururada bulshada ee ku lugta leh ka shaqeynta sidii loo dhimi lahaa saameynta aadanaha ee isbadalka Cimilada.
