Madaxweyne ku xigeenka dowladd Goboleedka Puntland Mudane Axmed Cilmi Cismaan “Karaash” ayaa furay Shirka isku xirka howlaha laamaha Hay’adda Socdaalka iyo Jinsiyadda dowladda Faderaalka ah ee Soomaaliya, kaasoo ka dhacay magaalada Garowe ee xarunta maamulka Puntland.
Shirkaan oo saddexdii biloodba mar la qabto waxaa looga hadlay howlaha isku xirka Laamaha Hay’adda Socdaalka iyo Jinsidaha, wixii qabsoomay, caqabadaha iyo fursadaha jira ee u baahan in laga faa’idaysto.
Madaxweyne ku xigeenka Puntland waxaa ku wehlinayay kulanka Agaasimaha guud Hay’adda Socdaalka iyo Jinsiyadaha Soomaaliya Col, Maxamed Aadan Jimcaale (Koofi), ku xigeenada, Agaasimaha guud, Wasiirka Amniga Puntland Cabdisamad Gallan,,madaxda Laamaha Gobolada Hay’adda Socdaalka iyo Jinsidaha (HSJ), Maamulka gobolka Nugaal, Kan degmada Garoowe, Saraakiisha Amniga ee kala duwan, Ururada Bulshada rayidka ah iyo Marti sharaf kale.
Madaxweyne ku xigeenka dowladd Goboleedka Puntland Mudane Axmed Cilmi Cismaan ayaa bogaadiyay shaqada ay Hay’adda Socdaalka iyo Jinsiyada ay bulshada u hayso, waxaana uu tilmaamay inay si dhow u wada shaqeeyaan, loona baahan yahay in ay sii laba jibbaaraan howlaha baaxadda leh ee ay Ummadda u hayaan.
Ugu danbayn Madaxweyne ku xigeenka dowlad Goboleedka Puntland ayaa hoosta ka xarriiqay in Puntland iyo Hay’adda Socdaalka ay leeyihiin wada shaqayn wanaagsan, waxaana uu ku ammaanay shaqada Muhiimka ee ay hayaan, isla markaana Puntland diyaar u tahay in mar walba ay xoojiso arimaha wada shaqaynta ay la leedahay hay’adda Socdaalka iyo Jinsiyadda dowladda Faderaalka ah ee Soomaaliya.
Wasiirka Amniga dowlad goboleedka Puntlanda Cabdisamad Gallan ayaa sidoo kale xalay casho sharaf ugu sameeyay magaalada Garoowe wufuuddii ka qaybgashay shirka isku xirka howlaha laamaha Hay’adda Socdaalka iyo Jinsiyadda dowladda Faderaalka ah ee Soomaaliya iyo maamul goboleedyada, kulankaan oo muhiimad gaar ah u lahaa horumarinta arrimaha socdaalka dalka ayaa ku soo dhamaaday jawi wanaagsan iyo is faham.
