Abbaarihii tobankii fiidnimo (10:00 PM) ee xalay ayaa niman wejiyada soo xirtay waxa ay weerar ku qaadeen maqaayad lagu qaxweeyo oo ku taala xaafadda Rinkeby oo ah xaafad ay ajaaniibta iyo Soomaalidu ku badan yihiin kuna taala waqooyi bari ee magaaladda Stockholm ee dalkaan Sweden.
Weerarkan ayaa lagu dilay laba wiil oo dhallinyaro Soomaaliyeed kuwaas oo da’dooda lagu sheegay 20 jir iyo 25 jir walaalo ah, waxaana durba goobta soo gaaray Booliska oo goobta ka bilaabay baaritaano xoog leh.
Illaa iyo hadda lama xaqiijin sababta dhalisay falkan ee dhimashada labada wiil iyo cidda ka dambeysay haseyeeshee goobjoogayaal ayaa warbaahinta u sheegay in ay arkeen rasaasta dhacaysay iyo rag wejiyada duuban oo maqaaxida ka baxaya.
Dadka Soomaaliyeed ee ku noool xaafada Rinkeby ayaa welwel iyo walaac ka muujiyey falkan naxdinta leh.
Sanadkii hore ayaa sedex wiil oo Soomaali ah magaalada Stockholm ugu dhinteen falal is rasaaseyn ah.
