“Isbadalka bulshadu sameyso ayaa lagu dhameyn karaa Aydhiska” waa halku dhigga sanadkaan ee maalinta caalamiga ah ee Aydhiska aduunka.
Munaasibad lagu xusayay maalinkaan oo ay qaban qaabadeeda iska kaashadeen wasaarada caafimaadka iyo gudiga ka hortaga Aydhiska ee Koofurta iyo Bartamaha dalka ayaa lagu soo bandhigay caqabada nololeed ee ay wajahayaan dadka la nool xanuunkaan, sidoo kale kulanlan waxaa lagu soo bandhigay wadiiqooyinka lagu yareyn karo, faafida cudurka iyo takoorka ay la kulmaan dadka qaba.
Related posts
Sacdiyo C, samad oo ah madaxa xakameynta cudurka Aydhiska ee wasaarada caafimaadka Somalia iyo Dr. Axmed Maxamed Jimcaalle gudoomiyaha daladda ka hortaga Aydhiska ee koofurta iyo bartamaha dalka ayaa madasho ku soo bandhigay xoga laga aruuriyay dadka la nool xanuunkaan iyagoona ku baaqay in la taageero.
Nasteexo Faarax Cilmi oo ka mida bulshada la nool xanuun Aydhiska ayaa cabirtay dareenkeeda iyo caqabadaha ay kala kulmaan bulshada inteeda kale.
Senator Cusmaan Maxamuud (Dufle) ayaa soo bandhigay waxyaabo badan oo aysan ku baraarugsaneyn Ummadda Soomaaliyeed kuwaasi oo uu ku faafi karo xanuunka Aydhisku.
Dr. Maxamed Saciid wasiir ku xigeenka wasaarada caafimaadka oo munaasibada soo xiray ayaa madasha ka sheegay in ka wasaarad ahaan ay diyaar u yihiin u gurmashada dadka xanuunkani haleeyay.
Dawo la’aan, midab takoor iyo shaqo la’aan ayaa ka mida caqabadaha nololeed ee ay wajahayaan dadka qaba xanuunka Aydhiska ee ku nool Soomaaliya, waxaana dunida oo idil maanta oo kale laga xusaa maalinka loo gaar yeelay xanuunka Aydhiska.
