Maamulka Dugsiga hoose, dhexe iyo sare ee ILEYS ACADEMY ee magaalada Muqdisho iyo ardeyda dugsigaas ayaa maanta deeq lacageed ku wareejiyay guddiga gurmadka abaaraha Qaranka Soomaaliya, si loo gaarsiiyo dadka ay saameeyeen abaaraha.
Deeqdan oo gaaraysa kun doolar iyo 300 oo kun oo shillinka Soomaaliga ah ayaa waxaa iska soo uruuriyay maamulka iyo ardeyda dugsiga ILEYS ACADEMY, waxaana deeqda lacageed loogu talo galay in wax loogu qabto dadka ay abaaraha ku saamaayeen gobollo ka tirsan dalka, iyadoo fikirka deeqda ay lahaayeen ardeyda Iskuulka.
Maamulaha dusgiga ILEYS ACADEMY, C/naasir Cali Maxamed iyo Dr Cabdixaliim Cabdullahi Sahal oo ah ku-xigeenkiisa ayaa labaduba sheegay in deeqdan lacageed ay tahay billow fiican, isla markaana ay sii wadi doonaan howlaha noocani ah oo kale.
“ Runtii arrintan waa billow, waan jecleyn in wax intaan ka badan in aan ugu deeqno dadka ay abaaraha saameyeen, waan ka xunnahay musiibada haysata dadkaas, waxaana fikirka arrintan uga mahadcelineynaa ardeyda iskuulka oo garowsaday in ay caawiyaan walaalahood Soomaaliyeed”ayay yiraahdeen
Qaar kamid ah ardeyda dugsiga oo dareenkooda ka hadlaya ayaa xusay in ay ku faraxsanyihiin in ay caawimaad billow ah u sameeyaan dadka ay abaaraha kula dhufteen gobollo ka tirsan Soomaaliya, iyagoo ardeyda asaagooda ah ku booriyay in ay ku daysadaan dugsiga ILEYS.
Sheekh Aadam Sheekh Cilmi iyo Khadiijo Ciise Faracadde oo ka tirsan guddiga gurmadka abaaraha Soomaaliya ayaa soo dhoweeyay deeqda lacageed ee ay ka heleen maamulka iyo Ardeyda Dugsiga ILEYS ACADEMY, iyagoo sheegay in ay gaarsiin doonaan dadka loogu talo galay.
“Waan ku faraxsanahay deeqdan ay iska soo uruuriyeen maamulka iyo ardeyda dugsigan, in carruurtan yaryar ay sidaan u fakaraan waa wax loo baahnaa, waxaana ay sameyn kartaa tallabadaan oo kale in ay ku dhiiradaan ardeyda asaagooda ah”.
Tallaabadan ay sameeyeen maamulka iyo ardeyda Dugsiga hoose, dhexe iyo sare ILEYS ACADEMY ee magaalada Muqdisho ayaa noqonaysa mid ku dayasho mudan, maadaama iskuulkan uu sameeyay billow fiican.
Sawir Qaade:- Farxaan Suleymaan Daahir
