Manhajka Waxbarashada dalka oo ay Wasaaradda Waxbarashada, Hidaha iyo Tacliinta Sare ee Xukuumadda Federaalka Soomaaliya ay soo saartay ayaa waxaa laga hergaliyay dhamaan goobaha waxbarashada dalka, taasi oo ay soo dhaweeyeen maamulayaasha, macalimiinta iyo ardayda Soomaaliyeed ee wax ka barata iskuulada Waxbarashada dalka
Manhajkan ayaa waxa uu qeyb weyn ka qaadanayaa horumarinta iyo tayeynta Waxbarashada Soomaaliyeed wuxuuna manhajka uu ku qoranyahay Afka Hooyo, iyadoo Wasaaradda Waxbarashada ay soo saartay amar iyo go’aano ku aadan in manhajkan mid aan aheyn aan lagu dhigi karin goobaha Waxbarashada guud ahaan dalka
Qaar ka mid ah ardayda wax ka barta iskuulada caasimadda ayaa soo dhaweeyay Manhajka Waxbarashada waxayna sheegeen in ay ka faa’iideen wax aad u wanaagsan, uuna uga duwanyahay manaahiijtii kala duwanaa ee wax lagu baranayay.
Macalin Cabdiraxman Abuubakar Cisman oo ka mid ah macalimiinta wax ka dhiga Iskuulka Hoose Dhexe iyo Sare ee Xamar weyne ayaa tilmaamay in manhajka cusub ee ay soo saartay Wasaaradda Waxbarashada uu yahay mid si weyn looga soo shaqeeyay, ayna wax badan ka faa’iideysan doonaan ardayda Soomaaliyeed.
Nuur Maxamed Xasan oo ka mid ah aqoonyahanada Soomaaliyeed oo ka hadlay farqiga u dhaxeeya manhajkan iyo manaahiijtii hore ayaa sheegay in aqoonyahanada ay soo dhaweynayaan manhajkan cusub
Maamulaha Iskuulka Hoose Dhexe Sare ee Xamar Weyne Xuseen Maxamed Guuleed ayaa xusay ahmiyadda Manhajka iyo sida ardaydu ula qabsdeen casharada ku qoran manhajka.,
Agaasimaha Waaxda manaahiijta ee Wasaaradda Waxbarashada Xukuumadda Federaalka Soomaaliya Maxamed Xasan Mukhtaar ayaa Sheegay in Wasaaradda Waxbarashada ay amar ka soo saartay in aan lagu dhigi kari goobaha Waxbarashada Manhaj ka duwan midka ay Wasaaradu soo saartay.
W/D: Muuse Cismaan Abtow
