Munaasabad uu xilka kula wareegayay Guddoomiyaha cusub ee gobolka Shabeelaha Hoose Mudane Ibraahim Aadan Cali Najax, ayna ka qeyb galeen Odoyaasha dhaqanka, saraakisha ciidanka qalabka sida, haweenka, culimaa’udiin iyo qeybaha kale ee bulshada ayaa maanta lagu qabtay degmada Afgooye.
Qaar ka mid ah odoyaasha dhaqanka oo goobta ka hadlay ayaa soo dhaweeyay guddoomiyaha cusub, iyagoo sheegay ina la shaqeyn doonaan, waxayna amaan u jeediyeen gudoomiyihi hore ee gobolka.
Guddoomiye ku-xigeenada arrimaha bulshada iyo amniga ee gobolka Shabeelaha Hoose oo dhankooda hadal kooban ka jeediyay xafladda ayaa sheegay inay si hagar la’aan ah ula shaqeyn doonaan guddomiyaha cusub, ayna ka go’antahay inay gacan ka geystaan horumarka gobolka.
Guddoomiyihi hore ee gobolka Shabeelaha Hoose Cabdiqadir Maxamed Nuur Siidii ayaa ka codsaday qeybaha bulshada inay la shaqeeyaan maamulka cusub, isagoo dhankiisa xusay in uu la shaqeynayo.
Guddoomiyaha cusub ee gobolka Shabeelaha Hoose Mudane Ibraahim Aadan Cali Najax ayaa sheegay in uu xoogga saari dono ka shaqeynta amniga, isagoo ka codsaday in gacan lagu siiyo gudashada waajiabadka loo idmaday.
Markii ay soo gabo gabowday xil wareejinta ayaa Guddoomiyaha cusub iyo mas’uuliyiin kale waxa ay kormeer ku soo sameeyeen waaxyaha ay degmada ka koobantahay, si ay u indho indheeyaan amniga magaalada.
