Maamulka Degmada Heliwaa ee Gobolka Benaadir ayaa deeq raashin ah u qeybiyay qoysas danyar ah oo ku nool degmada.
Guddoomiyaha Degmada Heliwaa Cabdixakiin Cumar Cabdulle ayaa sheegay in deeqdan ay tahay mid ka timid dowladda Cuman oo shacabka Degmada loo soo marsiiyay dhanka maamulka Gobolka Benaadir, isla markaana loogu talagalay 300 qoys oo ka mid ah qoysaska danyarta ah ee ku nool degmada Heliwaa.
“Alxamdullilah, Alle wuu nagu guuleysiiyay inay si nabadgelyo ah noogu dhamaato qeybinta raashin aan ugu talagalnay qoysaska danta yar ee ku nool degmada, xaqiiqdii raashinkan ma ahan mid dabooli karta baahiyaha gaarka ah ee ay qabaan qaar ka mid ah qoysaska degmada ku nool, balse waxa ay u noqoneysaa bilow fiican” ayuu yiri Guddoomiye Cabdixakiin Cumar.
Qaar ka mid ah qoysaskii ka faa’iideystay qeybinta deeqda raashinka ah ayaa uga Mahadceliyay maamulka degmada iyo cidkasta oo ku luglahayd in kaalmo la soo gaarsiiyo.
Guddoomiyaha Degmada Heliwaa ayaa kal hore sheegay inay ka go’antahay ka mira dhalinta go’aankiisa ahaa u adeegidda bulshada Habeen iyo maalin, iyadoo dhawaan uu dib u habeyn ku sameeyay qaar ka mid ah waddooyinka xaafadaha degmada Heliwaa oo markii hore ay dhibaato ku qabeen dadka deegaanka.
