Maamulka degmada Kaxda ee gobolka banaadir ayaa waxa ay degmada ka bilaabeen dib u dayactir xoogan oo dhanka waddooyinka ah, gaar ahaan wadada isku xirta deegaanka tareedisho iyo degmada Kaxda, kaasi oo loogu talagalay lagu fududeeyo isu socodka dadka iyo gaadiidka ka imaanaya gobolka Shabeelaha Hoose.
Dib u dayactirka wadada ayaa waxaa iska kaashanaya maamulka degmada, dadka deegaanka iyo maamulka gobolka banaadir, iyadoo wadadan ay aheyd mid mid xiran, isla markaana aan horey u shaqeyn jirin balse hada ay timid in baahi ay u qabaan dadka deegaanka awgeed dib u habeyn lagu sameeyo.
Guddoomiyaha degmada Kaxda Cabdi-kaamil Shukri Xirsi oo Warbaahinta kula hadlay halka ay ka socoto howlaha dib u dayactirka ayaa sheega in jidka uu noqday mid biyo fadhisad ah, ayna go’aansadeen iyaga oo kaashanaya maamulka gobolka iyo dadka deegaanka inay dib u dayactir ku sameeyaan.
Aamino Mursal Cabdi guddoomiyaha Ururka Haweenka degmada Kaxda oo u hadshay dadka deegaanka waxa ay soo dhaweysay dib u dayactirka wadada lagu sameynayo, iyadoo xustay inay diyaar u yihiin ka qeyb qaadashada horumarka degmada.
Sawir Qaade:- Farxaan Suleymaan Daahir
