Maamulka degmada Luuq ee gobolka Gedo ayaa faahfaahin ka bixiyay socdaal nabadeed oo ay ku mareen deegaanno badan oo ka tirsan gobolka.
Guddoomiyaha degmada Luuq oo hadda ku sugan degmada Doolow ee gobolka Gedo ayaa sheegay in ay socdaal nabadeed ku soo mareen deegaanno badan oo kamid ah gobolka ay dadku aad usoo dhaweeyeen, isagoo sheegay in dadka ku nool gobolka Gedo ay yihiin kuwa jecel dowladnimada.
Guddoomiyaha degmada Luuq ayaa sheegay in socdaalkaan ujeedkiisu ahaa sidii bulshada loo bari lahaa dowladnimada iyo muhiimada ay leedahay la shaqeynta ciidamada ammaanka wuxuuna sheegay in ay ka soo bilaabeen degmada Baardheere illaa degmada Doolow.
Dhanka kale Guddoomiye Gardhuub oo la hadlay Warbaahinta Qaranka ayaa sheegay in maalmaha soo socda argagaxisada Al-shabaab laga xureyn doono dhammaan deegaannada ay ku dhibaateeyaan dadka rayidka ah.
Guddoomiyaha ayaa sidoo kale sheegay in Ciidamada dhawaan soo gaaray gobolka Gedo ee ka socda dowladda Soomaaliya ay ka qeyb qaadan doonaan howlgallada maleeshiyada Alshabaab looga xureynayo gobolka.
