Maamulka Degmada Waaberi oo kaashanaya Taliyaha Saldhigda Degmada ayaa maanta tababar ku aadan dhanka sawir qaadista ah u furay 30 dhallinyaro ah, kuwaasi oo ka mid ah dhallinyarada degmada ku nool.
Tababarka ayaa waxaa casharada bixinayay macaliim qibrad u leh dhanka sawir qaadista ah, waxaana dhallinyarada la barayay sida ugu wanaagsan ay sawirada ku qaadi karaan, iyadoo dhalilinyarada qaarkood ay hiwaayad u lahaayeen tababarka loo furay, kuwaasi oo u baahnaa kaliya in la siiyo tababar xagga sawir qaadista ah.
Qaar ka mid ah dhallinyarada oo ka hadlayay tababarka loo furay ayaa sheegay in maamulka degmada ay uga mahadcelinayaan fursadan la siiyay, oo u noqon karto mid ay ku shaqeysan karaan.
Guddoomiyaha Degmaa Waaberi Marwo Xaawo Maxamuud Cali (Xaawo Kiin) oo furtay tababarka ayaa ku boorisay dhallinyarada tababarka loo furay inay ka faa’iideystaan, isla markaana abaal marin gaar ah la siin doono qofkii si fiican uga faa’iideysata fursadan.
Guddoomiyaha ayaa xustay in dhallinyarda degmada ku nool loo sameyn doono fursado lagu horumarinayo aqoontooda.
