Maamulka Degmada Xudur ayaa dhagax dhigay Mashruuc lagu dhisayo Ceel-riig laga hirgelinayo mid ka mid ah xaadafadaha ku yaala Xudur.
Dhagax dhigaan waa qeyb ka mid ah mashaariic lagu hormarinayo biyaha iyo fayadhoorka, waxaana fulinteeda iska kaashanaya Wasaaradda Tamarta iyo Kheyraadka Biyaha ee Dowlad Goboleedka Koonfur Galbeed Soomaaliya iyo Hay’ada IOM. .
Sidoo kale mashruucan waxaa qeyb ka ah dayactir iyo dhismo lagu samaynayo ilaa afar ceel biyood oo kan maanta la dhagax dhigay uu yahay Ceel-riig loo samaynayo Haanweyn iyo laba baraak oo xoolaha biyo ka cabaan, ceelkaan waxa biyaha ka soo saaraya korontada dhelisa soolarada cadceedda ku shaqeeya oo loogu talagalay sida ay noo Sheegeen Cabdi Saalax Axmed oo ka socda hay’adda IOM waaxdeeda biyaha iyo isuduwaha Wasaaradda tamarta iyo biyaha dowlad goboleedka Koonfur Galbeed Soomaaliya ee Gobolka Bakool Cabdullaahi Nuur Oomane.
Waa mashruuc ahmiyad gaar ah u leh bulshada reer xudur sababtoo ah magaalada ma lahan biyo gelin ee weli xaafadaha waxa biyaha geeya gaari dameerada halka dadka qaar aan awoodin ay dhabarkooda ku dhaansadaan.
Guddoomiyaha Xafiiska dib u dhiska degmada Xudur Cabdirisaag Isaak Saajin iyo Guddoomiyaha degmada Xudur Maxamed Macalin oo dhagax dhigey mashruucaan ceelriiga looga faa’ideysanayo oo u mahadceliyey Wasaaradda biyaha dowlad goboleedka Koonfur Galbeed Soomaaliya iyo hay’adda IOM ayaa sheegay in degmada Xudur u baahan tahay biyo gelin dhamaan xafadaha lawada gaarsiinayo.
