Guddoomiye Ku-xigeenka Arrimaha Bulshada iyo Wacyigelinta Maamulka Gobolka Banaadir Mudane Cabdicasiis Cismaan Maxamed ayaa si rasmi ah u xareeyay Macalimiinta iyo Ciyaartooyda Xulka Kubadda Cagta ee matalaya Gobolka Banaadir si ay ugu diyaar garoobaan Tartanka Kubadda Cagta ee Dowlad Goboleedyada iyo G.Banaadir oo dhowaan ka furmaya Magaalada Muqdisho.
Kulan dardaaran iyo kala aragti qaadasho u badneed ayaa waxaa ka qeyb galay Agaasimaha Guud ee Arrimaha Bulshada Iyo Wacyigelinta Gobolka Banaadir Mudane Cabdullahi Aadam Muuse, Guddoomiyaha Kubadda Cagta Gobolka Banaadir, Guddoomiyaha Naadiga Dowladda Hoose ee Xamar iyo Mas’uuliyiin kale oo ka tirsan Maamulka G.Banaadir.
Guddoomiye Cabdicasiis ayaa kula dardaarmay Xulka Dhallinyarada Kubadda Cagta Gobolka Banaadir inay sanadkaan difaacdaan Koobka Tartanka Kubadda Cagta ee Dowlad Goboleedyada iyo Gobolka Banaadir.
Ugu dambeyn Mas’uuliyiintii Munaasabadaan ka hadashay ayaa dhamaan Ciyaartooyda iyo Macalimiinta kula dardaarmay inay Shacabka reer Muqdisho ay guul ka sugayaan.
