Maamulka Gobolka Banaadir ayaa shaaciyay in waddooyinka aan lagu xiri karin boorarka ka sameysan marooyinka, iyagoo ka digay in ciddi lagu arka, laga qaadi doono tallaabo sharaciga waafaqsan.
Afhayeenka maamulka Gobolka Banaadir Cabdifataax Cumar Xalane oo la hadlay Warbaahinta Qaranka ayaa sheegay in maamulka uu mamnuucay in waddooyinka lagu xiro boorarka ka sameysan marooyinka ee ay ku qoranyihiin halku-dhigyo gaar ah, taasi oo uu ku tilmaamay inay wax u dhimeyso bilicda.
“Caasimadda laguma arki kar lo’, waxaa kaloo mamnuuc ah in boorarka ka sameysan marada lagu xiro waddooyinka magaalada, Laamiyada iyo waddooyinka lama jeexi karo, iyadoo aan maamulka gobolka laga heysan warqad ogolaansho ah, saddexdan qodob waa muhiim, waxaana ka digeynaa in arrimahan la sameeyo, ciddii lagu helana waxaa lala tiigsan doonaa sharciga” ayuu yiri Afhayeenka.
Afhayeenka ayaa xusay in maamulka gobolka uu kal hore hirgeliyay xarunta baadi qabadka oo lagu xareyn jiray xoolihii lagu arka caasimadda.
Cabdifataax Cumar Xalane ayaa tilmaamay in maamulka gobolka uu u taaganyahay sidii uu dib u soo celin lahaa bilicdii ay caasimaddu lahayd, isla markaana aysan ogolaaneyn waxkasta oo bilicd caasimadda wax u dhimaya.
