Maamulka gobolka Shabeelah Dhexe ayaa ka warbixiyay halka uu marayo qaban qaabada shirka maamul u sameynta gobolada Hiiraan iyo Shabeelaha dhexe, kaas oo dhowaan ka furmi doono magaalada Jowhar
Guddoomiye ku-xigeenka dhinaca ammaanka iyo siyaasadda ee gobolka Shabeelaha Dhexe Mudane Axmed Mayre Makaraan ayaa tilmaamay in maamulkooda oo kaashanaya shacabka ay diyaar garow xoogan ugu jiraan soo dhaweynta ergada ka qeyb galaysa shirka loo sameynayo maamulka labada gobol.
“Aad iyo aad bulshada gobolka ku dhaqan mas’uuliyad ayay iska saareen qabsoomidda shirka, waxaana uu intaa ku daray in goobta shirka lagu qabanayo ay diyaariyeen, isla markaana ay ka go’antahay qabsoomidda shirka” ayuu yiri Axmed Meyre.
Guddoomiye ku-xigeenka dhinaca ammaanka iyo siyaasadda ee gobolka Shabeelaha Dhexe ayaa hoosta ka xariiqay in amniga magaalada Jowhar iyo deegaannada kale ee ku xeeran ay tahay mid la isku halayn karo, isla markaana ay diyaar u yihiin in la soo xoojiyo nabadgelyada ka jirta gobolka.
Dhawaan ayaa la filayaa in magaalo madaxda gobolka Shabeelaha dhexe ee Jowhar uu ka furmo shirka maamul u sameynta gobollada Hiiraan iyo Shabeelada dhexe.
